Ainhoa Albistur Ahechu Nafarroako Unibertsitate Publikoko (NUP) Industria Ingeniaritzako Unibertsitate Masterreko ikasleak irabazi du #UPNAInvestiga zientziari eta teknologiari buruzko argazkien Instagram bidezko lehiaketa. Zientziaren, Berrikuntzaren eta Unibertsitateen Ministerioko Zientziarako eta Teknologiarako Espainiako Fundazioarekin (FECYT) lankidetzan antolatu du lehiaketa NUPek. “Fuerza invisible” izeneko argazki irabazleak irabiagailu magnetiko batek induzitutako imanen errotazio-mugimendua jasotzen du; horri esker, disoluzioak nahas daitezke laborategian. Lehen saria 150 euro eta dibulgazio zientifikoko liburu sorta bat da.
Argazki irabazlea, “Fuerza invisible”. Egilea: Ainhoa Albistur Ahechu
Gainera, lehiaketako bi accesitak NUPeko unibertsitate-komunitateko kide hauei egokitu zaizkie “ex aequo”: Pedro José Rivero Fuente, Ingeniaritza Saileko irakaslea eta Material Aurreratuen Institutuko ikertzaileari (InaMat), “Corrosión invasiva” argazkiagatik. Argazki horrek aluminioaren korrosioak eragiten duen narriadura erakusten du, giza begiarentzat hautemanezinak diren mikrohausturak (koskak eta ziztadak) sortzerainokoa; irudia mikroskopio baten bidez hartu zen; eta David Martínez Lucea, Bigarren Hezkuntzako Irakasletzako Unibertsitate Masterreko ikasleari, “Agua, aceite y luz III” izeneko argazkiagatik.
Accesita lortu duten irudietako bat. Izenburua: “Corrosión invasiva”. Egilea: Pedro José Rivero Fuente
Argazkian, ura eta olioa nahasten saiatzean sortzen den nahasketa heterogeneoa ikusten da. Molekulen polaritate-desberdintasuna dela eta, substantziek ez dute elkarreraginean jarduten eta bananduta mantentzen dira. Gainera, argiaren errefrakzio-prozesua eta olioak uretan duen flotagarritasuna ere hauteman daitezke, olioak dentsitate txikiagoa baitu. Honako hauek osatzen dute bi accesitetako bakoitza: 75 euro eta dibulgazio zientifikoko liburu sorta bat.
Accesita lortu duen beste argazkia. Izenburua: “Agua, aceite y luz III”. Egilea: David Martínez Lucea
#UPNAInvestiga zientziari eta teknologiari buruzko argazkien Instagram bidezko lehiaketa NUPeko unibertsitateko komunitateko kideei dago zuzenduta. Horretarako, gehienez ere hiru irudi jarri behar zituzten aipatu sare sozialean parte-hartzaileek, Unibertsitatea (@upna.nup) eta Zientziarako eta Teknologiarako Espainiar Fundazioa (FECYT) – Zientziako, Berrikuntzako eta Unibertsitateetako Ministerioa (@fecyt_ciencia) aipatu behar zituzten, eta #UPNAInvestiga “hashtag” edo etiketa, izenburu bat eta argazki bakoitza azaltzeko esaldi labur bat jarri. Unibertsitate Proiekzioko, Kulturako eta Dibulgazioko Errektoreordetzak sustatu du ekimena Kultura Zientifikoaren Unitatearen bidez.
