Nafarroako Unibertsitate Publikoko (NUP) Giza, Gizarte eta Hezkuntza Zientzien Fakultateak “Huarte de San Juan. Geografia e Historia” aldizkariaren 28. zenbakia argitaratu berri du.Aldizkaria sei herrialdetako ikertzaile batzuen 10 artikuluk eta 3 aipamenek osatzen dute, exhumazioei eta Espainiako oroimen historikoari buruzko dosier bat barne.
Editore nagusia eta NUPeko irakaslea den Álvaro Baraibar Echeverríak zenbakiaren aurkezpenean azaltzen duen moduan, “biktimen eskubideak gizarte osoari deitzen dio eta unibertsitateak rol garrantzitsua izan dezake bultzatzen eta garatzen dituen jakintza arloetan egiten dituen ikerketen bidez. Ikerketa taldeek izandako emaitzek aukera eman dute funtsezko aurrerapenak lortzeko eta, ondorioz, gertaerak berreraikitzeko, errepresio moduen analisia egiteko eta indarkeria frankistaren biktimen kokapena jakiteko, eta haiek identifikatzeko eta berreskuratzeko.”
“Exhumazioak eta oroimen historikoa Espainian: diziplina anitzeko ikuspegia” izenburua duen dosierrak zazpi lan batzen ditu, eta, Baraibar irakasleak adierazten duen moduan, “frankismoko biktimen memoria berreskuratzeko lanari eztabaidaezinak diren ekarpenak egiten dizkio”. Aipatutako artikuluak hobi komunetako exhumazioetara hurbiltzen dira historia, zientzia kriminalistikoa, arkeologia, antropologia soziala, kultura bisuala, etnografia eta monumentaltasun memorialista baliatuz. Lan batzuek Espainiako ikuspegi globala dute, eta beste batzuk, ordea, lurralde zehatzagoetara mugatzen dira: Nafarroako Foru Erkidegoa, Gaztela eta Leon edo Extremadura.
Esate baterako, Zahira Aragüetek berreraikitzen ditu familia bateko hobi komunak dokumentatzeko pertsona partikularrek egiten dituzten ikerketak. Ikerketa horietan artxibo familiarrak sor daitezke oroitzapenetatik, dokumentuetatik eta argazkietatik abiatuta. “Objektuen bilduma horiek memoriaz betetzen dira, eta indarkeria frankistaren ahazteari, inpunitateari eta traumei aurre egiteko beste modu batzuk eskaintzen dituzte exhumazioek bilaketa egin eta gero biktimaren identifikazioa eta berreskurapena lortzen ez dutenean.”
Aldizkariaren zenbakia egiten lagundu duten egileen artean honako hauek daude: Pablo García Colmenares, Paco Etxeberria eta Lourdes Herrasti, Laura Muñoz Encinar, Dorothée Delacroix, Zahira Aragüete-Toribi, Lee Douglas, Daniel Palacios González, Miguel Anxo Pena, Juan Cruz Alli Aranguren eta Pedro Oliver Olmo.
Horretaz gainera, aldizkariak Laura Branciforteren, Sergio Romanoren eta Santiago de Pabloren aipamenak ditu.