Wifia

Itzuli

Nafarroako Unibertsitate Publikoak, Informatika Zerbitzuaren bidez, datu-sarerako hari gabeko konektibitatea jartzen du unibertsitate-komunitateko kideen eskura, bitarteko horren bidez eskaintzen diren zerbitzuetara sarbidea errazteko helburuarekin: ikasgela birtuala, web-ataria, posta elektronikoa, Internetera sarbidea eta abar.

Hari gabeko sarea ohiko kable bidezko sarearen luzapen edo osagarri bat da, eta sare horretan zabalduta dago.

Gailu eramangarri edo mugikorretan erabiltzen da, hari bidezko sarea erabiltzea horren ohikoa ez den lekuetan: liburutegietan, ikasgeletan, biltzar-aretoetan, bilera-geletan eta abarretan.

Iruñeko Campuseko eraikin guztietan (Arrosadian eta Osasun Zentroan) hari gabeko estaldura dago, baita Tuterako Campusean ere.

Erabilera gehien aurreikusten den guneetan estaldura hobea emateko irizpideari jarraitu zaio: liburutegietan, ikasgeletan, ekitaldi- eta bilera-aretoetan, eta abarretan. Sarearen estaldura ona bermatuta dagoen lekuetan behar bezala seinaleztatuko da hari gabeko sarearen identifikadorea.

Nafarroako Unibertsitate Publikoaren hari gabeko sarea bateragarria da wifi 802.11b eta 802.11g estandarrekin, bere estaldura-eremu guztietan. Eremu horietako batzuetan, 802.11a estandarraren bidez ere sar daiteke hari gabeko sarera.

Hari gabeko sarera sartzeko moduak

- Sare ireki segurua (eduroam).

WPA2 eta AES estandarrak erabiliz, konexio guztiz zifratua lortzen da.

Unibertsitateko komunitateko erabiltzaile orok erabil dezake konexio mota hori, baita  eduroam ekimeneko beste unibertsitate batzuetako erabiltzaileek ere.

Eduroam da konektatzeko modu horren SSID sareko identifikadorea. WPA2 (AES) zifratze-mota erabiltzen da, eta EAP-TTLS-PAP edo PEAP-GTC autentifikatzeko modu baliagarriak. Internetera eta Unibertsitatearen sareko zerbitzu publikoetara sartzeko aukera ematen du.

- Sare ireki ez-segurua (UPNA).

Hari gabeko sareko euskarria duen edozein gailu konektatu eta sareko konfigurazio-parametroak lortu daitezke automatikoki.

Erabiltzaileak Interneteko zerbitzuren bat erabili aurretik, bere erabiltzailea eta sarbide-gakoa eskatuko zaizkio sartzeko orri baten bidez.

Unibertsitateko komunitateko edozein erabiltzailek erabil dezake konexio mota hori.

Konektatzeko modu horren SSID sareko identifikadorea UPNA da; hura da lehenetsitako sarea, sarrerako gailuek iragartzen dutena. Internetera eta Unibertsitatearen sareko zerbitzu publikoetara sartzeko aukera ematen du.

Erabilera-baldintzak

Unibertsitate-komunitateko kideek Nafarroako Unibertsitate Publikoaren datu-sarera sarbidea izango dute, datu horiek ikerketarekin, irakaskuntzarekin, kudeaketarekin edo Unibertsitatearen beraren xede eta helburuekin lotuta dauden jardueretan erabili ahal izateko.

Datu-sarea erabili edo datu-sare horretara sarbidea izateko (beste edozein helburutarako), Unibertsitatearen berariazko baimena beharko da.

Berariaz debekatuta dago datu-sarea legez kanpoko edozein jarduketarako erabiltzea.

Erabiltzaile guztiek eskura dituzten datuen konfidentzialtasuna errespetatu beharko dute.

Erabiltzaileek ez diete datu-sarera sartzen utziko Unibertsitatetik kanpoko beste pertsona edo erakunde batzuei, horiek Unibertsitatearen berariazko baimenik ez badute.

Datu-sarea modu eraginkorrean eta seguruan erabiliko da, ahal izanez gero, sarea ito gabe edo sarearen bidez birus edo har informatikoak hedatu gabe.

Sarera edo beste zerbitzu batzuetara sartzeko orduan unibertsitate-komunitateko kideak identifikatzen dituzten egiaztatze-datuak (erabiltzaile-izena eta pasahitza) pertsonalak eta besterenezinak izango dira.

Ezin izango da erabili hari gabeko sareko gailu aktiborik (sarbide-puntuak, routerrak eta abar); era berean, ezin izango da ad hoc hari gabeko sarerik sortu edo konfiguratu Informatika Zerbitzuaren berariazko adostasun edo baimenik gabe.

Eduroam

Eduroam RedIRIS proiektuaren baitan dagoen ekimen bat da eta nazioan hainbat erakunderen ekimenak koordinatzeaz arduratzen da, mugikortasun-eremu bakar bat lortzeko helburuarekin. Mugikortasun-eremu bakar hori nazioko eta nazioarteko hainbat erakunde akademikok osatzen dute eta horiek, erabilera-politika batean eta eskakizun teknologiko eta funtzional jakin batzuetan oinarrituz, batetik bestera mugitzeko aukera ematen diete beren erabiltzaileei; horrela, erabiltzaileek une oro erabil ditzakete behar izan ditzaketen zerbitzu mugikorrak. Erabiltzaile horiek, beste erakunde batera iristean, lan-inguru birtual bat erabili ahal izatea izango litzateke xede nagusia, ahalik eta modurik gardenenean. Horrela, lan-inguru birtual horretan erabiltzaileek Internetera konexioa, jatorrizko unibertsitateko zerbitzu eta baliabideetarako sarbidea, eta une horretan dauden erakundearen zerbitzu eta baliabideetarako sarbidea izango lukete.

Nafarroako Unibertsitate Publikoko erabiltzaileentzako jarraibideak

Unibertsitate honetako erabiltzaile guztiak eduroam-ekin konekta daitezke, Nafarroako Unibertsitate Publikoaren hari gabeko sarean nahiz ekimenaren barruan dagoen beste edozein erakunderen sareetan.

Unibertsitatearen sarera konektatzeko modalitate hori erabiliz, erabiltzaileak hark zifratuta dituen zerbitzuak erabili ahal izango ditu, web-autentifikazio bidez konektatzeko moduarekiko segurtasuna hobetuz.

Era berean, bisitatzen den beste unibertsitate baten sarea erabili ahal izango da, unibertsitate hori eduroam ekimenaren baitan badago. Kontsulta itzazu eduroam.es eta eduroam.org orriak, proiektuari atxikitako erakundeak zein diren jakiteko.

Eduroam konexioa konfiguratzeko, kontsulta ezazu konfigurazio-orria. Kontuan izan behar da konfigurazioa aldatu egin daitekeela beste unibertsitate batzuetan. SSID eta konfiguratu beharreko zifratze-mota konektatzen den erakundearen araberakoak dira

Eduroam ekimenaren barruan dagoen erakunde bateko erabiltzaile bisitarientzako jarraibideak

Proiektu honi atxikitako erakunde bateko kidea bazara, Nafarroako Unibertsitate Publikoaren hari gabeko sarea erabil dezakezu, unibertsitateko beste edozein erabiltzaileren baldintza berberetan.

Konektatzeko parametro lokalak SSID –eduroam– eta zifratze-mota –WPA2 (AES)– dira. Autentifikazio-sistema jatorrizko unibertsitatean erabiltzen dena da; normalean PAP duen EAP-TTLS izaten da, baina erabiltzailearen identifikadoreak jatorrizko erakundearen domeinua barne hartu behar du. Dena den, eduroam-ek unibertsitate horretan duen konfigurazioaren jarraibideak berrikustea gomendatzen da, baita jatorrizko zentroak zentzu horretan argitaratutako web-orriak ere.

Jatorrizko unibertsitatearen aplikazioren bat erabili nahi bada, kontuan izan behar duzu hark sarbide-mugak izan ditzakeela jatorrizko IP helbidearekin lotuta, eta beraz, aplikazio horretara sarbiderik ez izatea gerta litekeela. Beharbada, jatorrizko erakundeak aurreikusitako baliabide gehigarriren bat erabili ahal izango da (tunel bat, adibidez).

Eduroam konfigurazioa

Zure sistema eragilea Android bada, ziurta zaitez eduroamCAT aplikazioa instalatu duzula. Aplikazio hori Google Play eta Amazon Appstore plataformetan dago eskura. Aplikazio hori gabe ezin izango duzu zerbitzua erabili.

• Sartu orri honetan
• Orrian sartu ondoren, sakatu orri horren behealdean agertuko den botoian, honako hau dioena: “Eduroam erabiltzailea: deskargatu zure eduroam instalatzailea”, irudi honetan ikus dezakezunaren antzekoa:

Automatikoki, UPNAri dagokiola detektatuko du orriak. Sakatu UPNAri dagokion ikonoa, orriaren eskuineko goiko aldean agertuko dena, hemen agertzen denaren antzekoa:

Bertan, eguneraketa instalatzeko esteka agertuko da, wifira berriz konektatu ahal izateko. Esteka hori pertsonalizatuta egongo da detektatu den sistema eragilerako, baina honen antzekoa izango da:

Softwarea instalatu ondoren, modu egokian sartu ahal izango zara. Gogoratu, zure erabiltzaile-izena idazten duzunean, hura helbide elektroniko osoarekin bat datorrela: adibidea.xxxxxx@e.unavarra.es edo adibidea@unavarra.es

Segurtasuna

 Hari gabeko sareetan, transmisio-bidearen izaera dela-eta, erabiltzaile batek transmititu edo jasotako datuak beste batzuek eskura ditzake estaldura-eremu berean. Komunikazioen pribatutasuna bermatzeko ezinbestekoa da datuak zifratzea.

 Eduroam-eko informazio-trafikoa zifratua da, eta WPA2 eta AES (802.11i) estandarrak erabiltzen dira. Sartzeko modalitate hori erabiltzea gomendatzen da.

Zein da hari gabeko sarera konektatzeko modurik seguruena?

WPA2 (AES) zifratu bidezko eduroam erabiltzea da hari gabeko sarera konektatzeko modurik seguruena. Komunikazioen pribatutasunaren aurkako eraso ezagunak saihesten ditu. Zifratu gabeko sareen bidez konektatzeak (UPNA) ez du inolako segurtasunik ematen. Kasu horietan, aplikazioek (gmail, Facebook eta abar) eman behar dizkiete segurtasun-mekanismoak erabiltzaileei.

Informazioa UPNA bidez eskuratzen denean, sareko gailuek ez dute trafiko hori zifratzen; beraz, komenigarria da erabiltzen diren aplikazioek bereziki babestekoak diren datuak transmititzeko segurtasun-zerbitzuak eskaintzen dituztela ziurtatzea. Adibidez, ikaslearen atarira sartzeko edo posta elektronikoa irakurtzeko web segurua (https) erabiltzen bada, aplikazioak berak (nabigatzaileak eta web-zerbitzariak) babesten ditu bidalitako eta jasotako datuak, eta, beraz, datu horien pribatutasuna berma daiteke.

Bestalde, sarera konektatzen diren ekipamenduen sistema eragilea eta antibirusa eguneratuta mantentzea gomendatzen da, gerta litezkeen segurtasun-arazoak ekiditeko.

Era berean, une bakoitzean sareko interfaze bat bakarrik (haririk gabea edo hariarekin) aktibatuta izatea gomendatzen zaio erabiltzaileari, ekipamenduan hardwareko bi profil edo gehiago sortu gabe.

Galdera ohikoenak

Zein estandar onartzen ditu Unibertsitateko hari gabeko sareak?

Honako hauek dira hari gabeko gune guztietan onartzen diren estandarrak: 802.11b (2,4 GHz-ko maiztasun-bandan eta 11 Mbps-eko abiaduran), 802.11g (2,4 GHz-ko maiztasun-bandan eta 54 Mbps-eko abiaduran), 802.11a (5 GHz-ko maiztasun-bandan eta 11 Mbps-eko abiaduran) eta 802.11n (bi bandetan).

Zein sistema eragilerekin sar naiteke?

Sistema eragileak hari gabe sartzeko hardwarea onartzen badu, ez luke konexio-arazorik egon behar sarera modu irekian sartzeko. Sarrera mugatuaren kasuan, hari gabeko gailuaren kontrolagailuak WPA2 eta 802.1x-eko PEAP-GTC onartu beharko lituzke. Edonola ere, egiaztatu da Windows XP, Windows 7, Linux eta MacOS bateragarriak direla bi sarbide motetan.

Nola lor ditzaket nire erabiltzailea eta pasahitza sarean sartzeko?

Hasiera batean, irakasleek eta ikertzaileek, eta Administrazioko eta Zerbitzuetako langileek zerbitzura sartzeko erabiltzailea kontsultatu eta pasahitza alda dezakete TPSetan (unibertsitateko kutxazainak); horretarako, Unibertsitate Txartela behar dute.
Era berean, Unibertsitate Txartela duten ikasleek beren egiaztatze-datuak kontsulta ditzakete DATU PERTSONALAK atalean, campuseko edozein TPStan.

Zein da hari gabeko sarera konektatzeko modurik seguruena?

WPA2 (AES) zifratu bidezko eduroam erabiltzea da hari gabeko sarera konektatzeko modurik seguruena. Komunikazioen pribatutasunaren aurkako eraso ezagunak saihesten ditu. Zifratu gabeko sareen bidez konektatzeak (UPNA) ez du inolako segurtasunik ematen. Kasu horietan, aplikazioek (gmail, Facebook eta abar) eman behar dizkiete segurtasun-mekanismoak erabiltzaileei.

Euskarria

Gertakariak konpontzeko edo ekipamenduak konfiguratzeko, eta hari gabeko sarera konektatu ahal izateko, jarri harremanetan Informatika Zerbitzuko Erabiltzaileari Laguntzeko Atalarekin, 9090 luzapenean, edo apoyo.usuario@unavarra.es helbide elektronikoaren bidez.

• Hari gabeko sareari buruzko zalantza edo iradokizunen bat baduzu, edo azalpenen bat behar baduzu, jarri harremanetan Informatika Zerbitzuko Sistemen eta Komunikazioen Atalarekin, sistemas@unavarra.es helbidearen bidez.

Itzuli