Urretxindorra proiektuak aipamen berezia lortu du Nafarroako Onda Ceroren II. Sari Solidarietan

Pobreziaren eta bazterketa sozialaren kontrako borrokaren kategorian irabazi du saria Unibertsitatearen proiektuak

La vicerrectora de Proyección Universitaria y Relaciones Institucionales, Eloísa Ramírez Vaquero, junto a la estatuilla del lazo solidario.

Nafarroako Unibertsitate Publikoaren (NUP) Urretxindorra proiektuari aipamen berezia egin zioten atzo Nafarroako Onda Ceroren II. Sari Solidarioetan, “Pobreziaren eta bazterketa sozialaren kontrako borroka” izeneko kategorian. Proiektuaren bidez, Unibertsitateko ikasleek Nafarroako ikastetxeetako neska-mutilei laguntzen diete. Kategoriako sari nagusia “Acción en Red Tudela-Grupo Inclusión” izeneko proiektuari eman zioten atzo Civicanen egindako ekitaldian.

Idoia Altadillek eman zion hasiera Civicaneko ekitaldiari, Nafarroako Onda Ceroren lurralde zuzendariak; bukaera, berriz, Miguel Laparra Navarrok, Nafarroako Gobernuko Eskubide Sozialetako lehendakariordeak. Ekitaldian, lehenik, musika emanaldia egin zuen Isterria Hezkuntza Bereziko Zentroko Emozioen Abesbatzak.

Gainerako saridunak honako hauek izan dira: ATENA, desgaitasunaren eta mendekotasunaren kategorian (aipamen berezia Nafarroako Geriatria eta Gerontologia Elkartearentzat); AnaRASD, nazioarteko lankidetzan (aipamen berezia HELP-NA Nafarroako Suhiltzaileentzat); Pablo Iraburu Allegue, komunikazioaren kategorian; eta Caramelos El Caserío, enpresentzako sarian. Epaimahaiko kideak entitate hauetako ordezkariak izan dira: Nafarroako Onda Cero, “la Caixa” Gizarte Ekintza, Nafarroa Kutxa Fundazioa, Nafarroako Gobernua, Nafarroako Unibertsitate Publikoa eta Iruñeko Udala. NUPen izenean, Eloísa Ramírez Vaquero Unibertsitate Proiekzioko eta Erakundeekiko Harremanetarako errektoreordeak hartu zuen saria.

Nafarroako Onda Ceroren II. Sari Solidarioen helburua da aitortza publikoa egitea Nafarroako pertsona, entitate sozial, enpresa eta erakundeek foru komunitatearen barrenean zein kanpoan martxan jarritako ekimen solidarioei. Lan soziala egiteagatik aitortza merezi duten pertsona eta entitateek eskulturatxo bana jasotzen dute sari gisa, lazo metalizatu bat irudikatzen duena; izan ere, irudi hori, kolore batean eta bestean, elkartasunaren sinbolo bihurtu da nazioartean, eta arazo eta gaixotasun batzuen kontrako borrokaren ikur.

URRETXINDORRA PROIEKTUA

Urretxindorra proiektuaren seigarren edizioa, izan da aurtengoa —2016-2017 ikasturtean hasi baitzen—, eta NUPeko hamalau ikaslek eta Bernart Etxepare eta San Jorge ikastetxeetako neska-mutilek hartu dute parte (Iruñeko ikastetxeak biak). Ekimenean parte hartzen duten Unibertsitateko ikasleak haur horien mentore bihurtzen dira, eta alderdi kulturalak eta sozialak lantzeko elkarguneak eta norberaren ikaskuntzarako aukerak sortzen dituzte, laguntza eskaintzen diete, eta eredu positibo gisa agertzen dira haien aurrean.

Proiektu hori Nafarroako Unibertsitate Publikoak bere Plan Estrategikoaren esparruan sustatzen dituen gizarte erantzukizuneko jardueren barnean kokatzen da. Seigarren edizioan, eta baita bosgarrenean ere, Unibertsitateko Unesco Katedrak laguntza eman du ikasle mentoreak prestatzeko eta oro har mentoretza sozialari buruzko gogoetaguneak sortzeko. Edizio hau kontuan hartuta, 60tik gora lagunek egin dute mentore lana, eta bederatzi ikastetxe izan dira ekimenaren onuradun..