Aurkezpena

Nafarroako Unibertsitate Publikoko Hiritartasunari, Bizikidetzari eta Aniztasunari buruzko UNESCO Katedraren bigarren urteurrenaren harira, heldu den martxoaren 29an, arratsaldeko 18:00etan, Sario eraikineko Fernando Remacha aretoan (Nafarroako Unibertsitate Publikoan) honako hitzaldi hau eskainiko da: "Hiritartasuna eta inmigrazioa: erabat osatzera inoiz iristen ez diren erakunde konplexuak”. Saskia Sassen irakasleak eskainiko du hitzaldia; izan ere, mundu mailako aditua da globalizazioa, migrazioak, boterea eta desberdintasunak gaietan.

Saskia Sassenek Robert S. Lynd soziologia katedra betetzen du eta The Committee on Global Thought zuzentzen du elkarlanean Columbia Unibertsitatean (www.saskiasassen.com). Editorial Katz argitaletxeak (Buenos Aires eta Madril) bere azken liburuetako bi argitaratu ditu gaztelaniaz: Territorio, Autoridad, Derechos: Ensamblajes Medievales y Globales (2010), eta Una Sociología de la Globalización (2008). FLACSO argitaletxeak (Quito) berriki argitaratu du Ciudad y Globalización (2011) bere azken saiakeren bilduma. Bere liburuak 21 hizkuntzatara itzulita daude; gaztelaniara itzulita 6 liburu ditu. Hainbat komunikabidetan parte hartzen du; horien artean daude Le Monde, Newsweek International eta Clarín. www.OpenDemocracy.net eta www.HuffingtonPost.com guneetan idatzi ohi du.

Ibilbide luze horretan, bere ekarpen handienetako bat hiri globalaren kontzeptuaren garapena da, hiria tokikoa dena eta globala dena gurutzatzeko leku gisa aztertzeko erabiltzen den terminoa. Sassenen lanen beste ekarpen funtsezko bat, globalizazio prozesuen ondorioz sortutako botereari eta desberdintasunei buruzko azterlanetan datza.