2023ko CWTS Leiden Rankingak informazio garrantzitsua ematen du mundu osoko 1.400 unibertsitate baino gehiagoren jardun zientifikoari buruz. Leiden University-ko Centre for Science and Technology Studies zentroak egiten du ranking hori (Herbehereak).

Ranking horrek datu bibiometrikoen arabera sailkatzen ditu unibertsitateak. Bibliometria ekoizpen zientifikoaren inpaktua eta ikusgarritasuna ezagutzeko eta hobetzeko balio duen diziplina da. Analisi bibliometrikoaren helburuen artean dago honako hauek aztertzea: dokumentu zientifikoen kopurua, ugaritzea eta banaketa; zer egitura eta zer dinamika dituzten horiek ekoizten eta kontsumitzen dituzten taldeek; eta dokumentuok zer informazio duten.

Unibertsitate bat ranking horretan sartzeko, bete beharreko baldintza da aztertutako aldian 800 argitalpen indexatu baino gehiago argitaratu izatea Web of Science webgunean. Oraingo rankinga 2018-2021 aldiari dagokio.

Eremu geografikoaren, zientifikoaren eta adierazle motaren arabera ematen ditu sailkapen zerrendak.

Esate baterako, eragin zientifikoari begiratuta eta arlo zientifikoak globalki hartuta, NUP 1. postuan dago Espainiako unibertsitateen artean PP (top % 1) adierazlean. Adierazle horrek beren arloetan aipamen gehien dituzten argitalpenen % 1en artean dauden argitalpenen proportzioa adierazten du. Adierazle horretan “Matematika eta Informatika” arloari edo “Zientzia Biomedikoak eta Osasuna” arloari begiratuz gero, NUPek 1. lekua du Espainiako unibertsitateen artean eta hurrenez hurren 66. eta 69. postuetan dago mundu osoko unibertsitateen artean.

PP (top % 10) adierazlea hautatuz gero –argitalpenen zer proportzio dagoen beren arloetan aipamen gehien dituztenen % 10en artean–, NUP hirugarren postuan dago Espainiako unibertsitateen artean eta arlo zientifikoak globalki hartuta.

Bestalde, nazioarteko kolaboraziozko argitalpenen adierazlea aztertuta –bi herrialdetako edo gehiagotako erakundeekin lankidetzan egindako argitalpenen proportzioa islatzen du–, NUP 2. postuan dago Espainiako unibertsitateen artean “Zientzia Biomedikoak eta Osasun Zientziak” arloan, eta 5.ean “Matematika eta Informatika” arloan.

CWTS Leiden Rankingek 2021ean NUPi buruz egindako balorazioaren eta irizpideen xehetasunak kontsultatu nahi izanez gero, sakatu hemen.

Rankinga egiteko erabili den metodologia hemen dago kontsultatzeko.