2009ko urriaren 21a
Nafarroako Unibertsitate Publikoan heldu den ostiralean, urriaren 23an, “Giza eskubideak eta VIH-HIES” II. Jardunaldia egingo da. VIH duten pertsonen gizarteratzea eta laneratzea” izenekoaren II. Jardunaldia, Sare Elkarteak eta Nafarroako Hiesaren Aurkako Herri Batzordeak antolatuta. Unibertsitatea lankidetzan aritu da ekimen honetan, Unibertsitate Osasungarriaren aldeko Planaren, eta Nafarroako Gobernuaren Osasun Sailaren bidez.
Jardunaldia goizeko 9:00etan hasiko da Arteak eraikineko Ada Byron aretoan, eta kolektibo horren babes juridikoarekin eta lan eskubideekin lotura duten adituak eta profesionalak egongo dira. Egitaraua hiru hitzaldiren aurkezpenarekin hasiko da. Lehenbizikoan, Miguel Ángel Ramiro Avilés, Madrilgo Carlos III Unibertsitateko Instituto de Derechos Humanos Bartolomé de las Casas delakoaren zuzendariordea, VIH duten pertsonen babes juridiko eta sozialari buruz mintzatuko da. Joan Bertran de Bes, Red 2002ko Observatorio de DDHH y VIH-SIDA elkartearen koordinatzaileak, lan eremuko eskubideen eta erakunde honen esperientzia azalduko du. Aldiz, Arrate Agirrezabal, Coordinadora Estatal del VIH-Sida (Cesida)ko kideak, “VIH duten pertsonen laneratzerantz” izeneko hitzaldia emango du.
Programak bi mahai-inguru izango ditu ondoren, eta horietan gai hauek landuko dira: jokabide onak laneratze gaietan, eta estrategiak eta tresnak enpresetan sentsibilizatzeko. Lehenengoan parte hartuko dute Julio Gomez jauna, Trabajando en Positivo izeneko federazioaren koordinatzailea, José María García jauna, Traperos de Emaús erakundearen zuzendaritzako kidea, eta Kristina Alfaro andrea, Gaztelan fundazioaren enplegu teknikaria.
Azkenik, enpresetan sentsibilizatzeko estrategiei eta tresnei buruz arituko den mahaian parte hartuko dute UGT eta CCOO sindikatuetako Lan Osasuneko arduradunek, María José Latasa eta María Carmen Sesma andreek, hurrenez hurren, eta enpresaburuen eta GKEen hainbat ordezkarik.
