Alfonso Carlosena García (San Martín de Unx, Nafarroa, 1962), ezkondua, bi alaba ditu, Fisika Zientzietan lizentziaduna da Zaragozako Unibertsitatean (1985), lizentziaturako aparteko sariduna, eta doktorea unibertsitate berean (1989). Zaragozako Unibertsitatean aldi batean irakasle laguntzaile izan ondoren, eta Zuricheko Swiss Federal Institute of Technology izenekoan, ikertzaile gonbidatu gisa, doktoretzaren ondorengo hainbat egonaldi egin eta gero (1989. eta 1991. urteetan), Nafarroako Unibertsitate Publikoan hasi zen irakasle laguntzaile lanetan 1992. urtean, eta 2000.ean Seinalearen Teoria eta Komunikazioak jakintza arloko katedra erdietsi zuen. 2004-2005 ikasturte osoa Estatu Batuetan eman zuen, Arizona State University (Tempe, AZ) unibertsitatean ikerketak egiten, eta lehenago hiru hilabete zituen emanak (1999.ean), New Mexico State University izenekoan.

Ikerketa proiektu ugariren zuzendaria izan da Elektronikaren, Instrumentazioaren eta Seinalearen Prozesatuaren arloan, eta, ondorioz, ehundik hurbil artikulu argitaratu ditu nazioarteko aldizkari indexatuetan, eta ustiatzeko bidean dauden nazioarteko lau patenteren egilea da. Aldi berean hamabi doktoretza tesi zuzendu ditu. Halaber, etengabe lankidetzan aritu da, Espainiako eta atzerriko enpresekin, merkataritzako produktuak garatzen. Ikerketa lanagatik hainbat sari jaso ditu, esaterako, BBV, Iruñeko Udal Aurrezki Kutxarena eta 2004ko Ideactiva.

Irakaskuntzako kudeaketa-lanean duen esperientziari dagokionez, aipatzekoa da Unibertsitatearen Ikerketa Emaitzak Bestetaratzeko Bulegoko (OTRI) zuzendaria izan dela, Doktoretza Batzordeko burua, eta batzordekidea Kalitatea Ebaluatu eta Egiaztatzeko Agentzia Nazionalaren (ANECA) Ikasketa Teknikoen Batzordean.